मराठी साहित्य – कविता ☆ विजय साहित्य #159 ☆ ईश वंदन…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 159 – विजय साहित्य

☆ ईश वंदन…! ☆ कविराज विजय यशवंत सातपुते ☆

(वसंत पंचमी.. देवी शारदा जन्मोत्सव निमित्ताने काव्य रचना…)

विनम्र भावे, माझे वंदन

आशिष द्यावा गौरी नंदन………||धृ.||

विद्या दायिनी, देवी शारदा,

रहा पाठिशी, सदा सर्वदा

कला गुणांचे, भाळी चंदन……||१||

अभिजात ते,विणा वादन

मती गतीचे, तूं मानांकन

जन्मदिनी या, जागे स्पंदन……||२||

शब्द फुलांची, ओंजळ हाती

नव निर्मिती, जुळवी नाती

काव्य कलेचे,व्हावे मंथन……||३||

ऋतू वसंती, सजे पंचमी

अक्षर लेणे, तुझ्या संगमी

प्रतिभा शक्ती, होई गुंजन…..||४||

माघ पंचमी, मिळो चेतना

कृपा प्रसादी, तुझी प्रेरणा

वाणी, वैखरी, हे संकीर्तन……||५||

© कविराज विजय यशवंत सातपुते