मराठी साहित्य – कविता ☆ साप्ताहिक स्तम्भ # 103 – साद ☆ कविराज विजय यशवंत सातपुते

कविराज विजय यशवंत सातपुते

साप्ताहिक स्तम्भ # 103 – विजय साहित्य

☆ साद ☆ कविराज विजय यशवंत सातपुते ☆

आलें आले संमेलन

मांदियाळी लेखकांची

साहित्यांचे उपासक

लावा वर्णी रसिकांची…! १

ठेवा दूर मानपान

नको चर्चा खलबत

साहित्याच्या सागरात

सोडा नवे गलबत…! २

नवे जुने साहित्यिक

भेटायाची दैवी संधी..

पुर्वग्रह दुषिताने

नका होऊ जायबंदी…! ३

आलें आले संमेलन

वैचारिक मेजवानी

माणसाची माणसाला

स्नेहभेट खानदानी…! ४

खानदान साहित्याचे

विविधांगी अगणित

नको यांत कंपूगिरी

व्हावी कला द्विगुणित..! ५

नको यांत जात पात

नको कर्मठ प्रवाह

साहित्याच्या शब्दांगणी

हवा प्रतिभेला वाव…! ६

कसें नसावे लेखन

यांचे करून मनन

साहित्यिक मेळाव्यात

करू प्रतिभा जतन…! ७

आलें आले संमेलन

नको प्रमाद नी वाद

नको लौकिक आभासी

हवी अभिजात साद..! ८

© कविराज विजय यशवंत सातपुते