डॉ.सोनिया कस्तुरे
कवितेचा उत्सव
☆ माणूस ती..! ☆ डॉ.सोनिया कस्तुरे ☆
ना गंगा भागिरथी। ना सौभाग्यवती
स्वतंत्र, सक्षम व्यक्ती । माणूस ती ।
लक्ष्मी ना सरस्वती । ना अन्नपूर्णा,
सावित्रीची लेक । माणूस ती ।
गृहिणी, नोकरीधारी । कुटुंब असेल
वा असेल एकटी । माणूस ती ।
शिक्षित,अशिक्षित । गरीब, श्रीमंत
सशक्त वा दुर्बल । माणूस ती ।
दुर्गा,अंबिका । कालिका, चंडिका
देव्हारा नको । माणूस ती ।
प्रजननक्षम तरी । नाकारेल आईपण
निष्फळ वा ट्रान्सजेन्डर। माणूस ती !
काळी वा गोरी । कुरूप वा सुंदरी
विदुषी वा कर्तृत्ववान । माणूस ती !
पूजा नको । दुय्यमत्व नको
समतेची भुकेली । माणूस ती !
ना अधिकार कुणा । छळण्याचा
गर्भात संपवण्याचा । माणूस ती ।
© डॉ.सोनिया कस्तुरे
विश्रामबाग, जि. सांगली
भ्रमणध्वनी:- 9326818354
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
