श्री हरिश्चंद्र कोठावदे
कवितेचा उत्सव
☆ मराठगीता… ☆ श्री हरिश्चंद्र कोठावदे ☆
ज्ञानियाची एक ओवी
अमृताची भक्तिगंगा
धन्य सारी संततीर्थे
प्राप्त मोक्षत्व अभंगा !
अटकेपारही झेंडे
शिवबाच्या मावळ्यांचे
समशेरींना वंदन
शाहिरांच्या पोवाड्यांचे !
वीररसाच्या संगती
शोभे शृंगार साजिरा
लावणीच्या वसंतात
येई लावण्य मोहरा !
साध्यासोप्या रूपकांचा
होई संदेश भारूड
गौळणीचे रूपरंग
भक्तिपीठाचे गारूड !
लोकगीतांच्या धारांचे
स्थानमहात्म्य आगळे
ओल्या मातीचा सुगंध
शब्द , सूरात दरवळे !
माय रात्रीचा गंधर्व
झोपे पाळण्यात बाळ
झरा अंगाईचा वाहे
स्वप्नीसुद्धा झुळझूळ !
कोण्या केशवाचा सुत
गेला फुंकून तुतारी
कोण्या कुसुमाग्रजाची
भव्य दिगंत भरारी !
पुनर्जन्म वाल्मिकीचा
जन्मे गीतरामायण
रामकथेचे उत्कट
घरोघरी पारायण !
ऋतुरंग ओलेचिंब
कुण्या जिप्सीच्या कवनी
कंठी आनंदयात्रीच्या
भावभावनांची गाणी !
निरक्षरा अक्षराची
लाभे संजीव मोहिनी
मृदगंधा नभापार
नेई बहिणाई कोणी !
प्रभंजन मर्ढेकरी
प्रतिमांची ढगफुटी
अभिव्यक्तीस मोकाट
आशयाच्या दिशा दाही !
दीन वंचितांचे लाव्हे
आली होऊन तुफाने
हादरले सारस्वत
‘गोलपीठा’च्या स्फोटाने !
संध्यागीतातील ग्रेस
पैलपारीचे चिंतन
एक धुके सांजवेळी
जणू गडद , गहन !
फुलराणीच्या गंधात
सप्तरंगी श्रावणात
रिमझिमे बालकवी
रसिकांच्या अंगणात !
एका भटाची गझल
रक्तचंदनाची धार
रसिकांच्या काळजात
एक सुरी आरपार !
संत पंत आणि तंत
त्रिवेणी ये संगमास
सदा सिद्ध सारस्वत
नवनव्या प्रवाहास !
प्रतिभावंत शब्दांचे
गंधर्वांच्या कंठी सोने
गीत संगीतात येता
धन्य श्रुती , धन्य जीणे !
प्रतिभेच्या पाखरांना
मायबोलीचे हाकारे
एक एक तारा तुम्ही
एक एक नभ व्हा रे !
माझ्या मायमराठीची
किती वर्णू मी थोरवी
नित्य नवे वारकरी
नित्य नूतन पंढरी !
© श्री हरिश्चंद्र कोठावदे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
