मराठी साहित्य – कवितेचा उत्सव ☆ भाग्यरेषा… ☆ श्री सुहास सोहोनी ☆

श्री सुहास सोहोनी

 कवितेचा उत्सव 

🌳 भाग्यरेषा… 🌳 श्री सुहास सोहोनी ☆

ना पुष्प लगडले

कधीहि फांदीवर

मग यावे कैसे

मधूर फळ रुचकर

खरखरीत पाने

हिरवट मळकट  दिसती

खोडावर खवले

दृष्टीसही बोचती —

वृक्षांच्या गर्दित

मीहि एकला वृक्ष

सामान्य कुळातिल

करावया दुर्लक्ष

संगोपन होण्या

कधीच नव्हतो पात्र

मोजतो जन्मभरि

दिवस आणखी रात्र —

ना मिळे भव्यता

पिंपळ वटवृक्षाची

ना सुंदरता ती

कदंब वा बकुळीची

भरगच्च दाटि ना

फांद्यांवर पर्णांची

ना पिले खेळती

अंगावर पक्षांची —

परि भाग्य लाभले    

भरुन काढण्या उणे

अन् देवदयेने सुदैव

झाले दुणे

मन तृप्त होउनी

न्हाले संतोषात

मज जन्म लाभला

पवित्र देवराईत !! —

© सुहास सोहोनी

रत्नागिरी

दि. १९-०३-२०२३.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈