सौ. उज्वला सुहास सहस्रबुद्धे
☆ श्वास… ☆ सौ. उज्वला सुहास सहस्रबुद्धे ☆
☆
श्वास घेऊनी जन्मा येतो ,
एक जीव तो जगण्यासाठी!
अखंड त्याची सोबत असते,
‘ मी कोण ‘ हे जाणण्यासाठी!….१
जेव्हा कधी कोंडतो तेव्हा,
जाणीव त्याची जगण्यामध्ये!
विसरलेल्या”श्वासास” शोधतो,
आपण आपल्या देहामध्ये ….२
पंचप्राण हे चालू रहाती,
श्वासाचे आंदोलन असे !
फुकाच आहे देह बापडा,
श्वासाविण त्या अस्तित्व नसे!…३
दिली बासरी देहाची ही,
ईश्वराने अपुल्या हाती!
हवा लागते फुंकायाला,
तेव्हा होतसे स्वर निर्मिती!….४
स्वर मधुर बासरीचा येई,
त्या श्वासाच्या हिंदोळ्यातून!
नसते जेव्हा साथ हवेची ,
श्वास थबकतो अंतरातुन….५
कृपा तुझी ही देवा आगळी,
एकेका श्वासातून पाझरते !
तूच आधार या देहाचा ,
सत्य मनास तेव्हाच उमगते !….६
☆
© सौ. उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
