मराठी साहित्य – कवितेचा उत्सव ☆ एक घरटे… ☆ सौ.वनिता संभाजी जांगळे ☆

☆ एक घरटे… ☆ सौ. वनिता संभाजी जांगळे ☆

☆

धुक्यातून उधळत येती

रंग सोनेरी पिवळे

पानाआडून जागती

फांदीवरी एक घरटे

*

हळूच उघडत जाती

चिमुकले लुकलुक डोळे

इवल्याशा चोचित येती

मधूर किलबिल गाणे

*

सुर धरून गाऊ लागती

छेडीत सुरांचे तराणे

हळूच डोकावत येती

रवीकराची नाजूक किरणे

*

घरट्याच्या दाराशी होती

पंखांचे हळूच फडफडणे

दूर पक्षिणी उडून जाती

चोचित आणण्या दाणे

*

किलबिल गुंजू लागती

इवल्याशा जीवाचे रडणे

बळ अजून पंखात नसती

नसे ते आईमागुन धावणे

☆

© सौ.वनिता संभाजी जांगळे