श्री शरद कुलकर्णी
कवितेचा उत्सव
☆ कोणते नाते ?… ☆ श्री शरद कुलकर्णी ☆
☆
लेवून श्यामलं वसने,
सांज नभाला आली.
क्षितिजावर झुकून अलगद ,
सांगून कांही गेली.
मी मिटून पापणी माझी,
तुझेच स्वप्न पहातो.
खिडकीत सलगीने मग,
चंद्र असा का येतो.
सारुन दूर तमाला,
चांदणे सहिष्णू होते.
मी पुन्हापुन्हा नव्याने,
शोधीन आपले नाते.
थांबवेन मी चंद्राला,
तू थांब,नको ना जाऊ.
सांग अशा नात्याला ,
मी नाव कोणते देऊ?
☆
© श्री शरद कुलकर्णी
मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
