सुश्री अरूणा मुल्हेरकर
कवितेचा उत्सव
☆ ‘जखमा उरात माझ्या…’ ☆ सुश्री अरूणा मुल्हेरकर ☆
☆
ते शब्द बोचणारे जखमा उरात माझ्या
आभाळ दाटलेले हे काळजात माझ्या
*
चंद्रास लागलेला तो डाग पाहुनी मी
दाटे मनात शंका का अंतरात माझ्या
*
वठतात वृक्ष सारे जेव्हा ऋतू बदलतो
हा खेळ प्राक्तनाचा येते मनात माझ्या
*
आशा जरा न उरली नाही उमेद आता
सुकली फुले कशाला या अंगणात माझ्या
*
देवा तुला स्मरावे हा एक मार्ग आता
ही आर्तता मनीची आहे सुरात माझ्या
☆
© सुश्री अरूणा मुल्हेरकर
डेट्राॅईट (मिशिगन) यू.एस्.ए.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
