सौ विजया कैलास हिरेमठ
कवितेचा उत्सव
☆ “कोण खरं कोण खोटं ?” ☆ सौ विजया कैलास हिरेमठ ☆
कोण खरं कोण खोटं
जगण्यापेक्षा असतं का ते मोठं
जे जसं आहे तसं
स्वीकारलं तर काय बरं बिघडतं …
*
काय चूक काय बरोबर
ठरवणं महत्वाचं असतं का खरोखर
चुकातूनही शिकता येतं
बरोबर तरी नेहमीच कुठं सोबतीला राहतं…
*
बदल नेहमी चांगला असतो
तरीही नकोनकोसाच वाटतो
न बदलता कुणाला बरं रहता येतं
बदललोच नाही तर जगणंच कठीण होवून बसतं ….
*
माझं ते माझं ,तुझं ते तुझं
सगळंच सारखं सगळ्यांचं
असं का होतं कुठं
वेगळेपण प्रत्येकाचं असतं महत्वाचं …
*
नको तक्रार नको स्पर्धा
तुलनेत जीव होई अर्धा अर्धा
स्वीकारू जो आहे जसा तसा
हाच सुंदर आयुष्याचा मार्ग सोपा…
💞शब्दकळी विजया💞
© सौ विजया कैलास हिरेमठ
पत्ता – संवादिनी ,सांगली
मोबा. – 95117 62351
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
