प्रेमकवी दयानंद
कवितेचा उत्सव
☆ नमन कवीकुलगुरू कालिदासा ☆ प्रेमकवी दयानंद ☆
☆
आषाढातील, प्रथम दिनी
कृष्णमेघ, जमले नभांगणी
सुरु जाहली, सजल जलक्रीडा
पाहुनी व्याकुळ, गजगामिनी..
अमल,धवलगिरी, शिखरावरती
नांदीस नर्तन,मेघांचे
धूम्रवर्ण, वायुमंडलामधे
दर्शन, दिग्विजयी मेघांचे…
सूरवंदनी,वर्षाधारा
सृष्टीचे हे,पूजन मंगल
वृक्ष-वेली, पुलकित अवघे
घनकलशीचे, झरे पवित्रजल…
कृष्ण-घनांचे, सुंदर दर्शन
नयनरम्य, ते विखुरले
पंख पाचुचे, रंग प्रीतीचे
रानी-वनी,नीलमयूर, नाचले…
विरही, व्याकुळ, प्रेमी कान्ता
दुरुनी जाणी,कालिदास मनी
यक्षाला अन् मेघाला, झणी
पाठवी सत्वर, दूत म्हणोनी..
आषाढातील, प्रथम दिन हा
कालिदास,यक्ष, मेघाचा
निसर्ग उत्सव, प्रतिमा-प्रतिभा,
काव्यसौंदर्य,साहित्याचा…
प्रवास अलौकिक, हा प्रतिभेचा
सोहळा, अक्षर संस्कृतीचा
कवी कुलगुरु, कालिदास हा, थोर प्रथम कवी,जगी आदरणीय, सर्वांचा..🙏🏼
☆
© प्रेमकवी दयानंद
संपर्क – तावरे काॅलनी.सातारा रोड.पुणे
मो 9822207068
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
