सुश्री नीलांबरी शिर्के
कवितेचा उत्सव
☆ आला श्रावण पाहुणा… ☆ सुश्री नीलांबरी शिर्के ☆
☆
सारीकडे पावसाचा
सुरू आहेच धिंगाणा
त्यात आवडता मास
आला श्रावण पाहुणा
*
पाणलोट वाढलेला
तो गिळे कितीकाला
जीव देणारा पाऊस
झाला जीव भ्यायलेला
*
काही समजेना मना
पंचमहाभुताचा खेळ
कसा काय जगण्याचा
सांगा लावायचा मेळ
*
गुरे गोठ्यात बांधून
पाण्याखालती वैरण
गायीचे निरागस डोळे
तीची रिकामी गव्हाण
*
पाणी वाढता चौफेर
पंप गेले पाण्याखाली
विजेचाही चाले खेळ
आत्ता होती आत्ता गेली
*
सारीकडे चिकचिक
वाढे साम्राज्य डासांचे
रोगराई वाढविण्या हे
कारण असे महत्वाचे
☆
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
