श्री राजकुमार दत्तात्रय कवठेकर
कवितेचा उत्सव
☆ समंजसतेने… ☆ श्री राजकुमार कवठेकर ☆
☆
किती जागवाव्या रात्री
टक्क पापण्यांनी….
किती होरपळावे या
चंद्र चांदण्यांनी…
*
किती ग्रीष्म शिशिरांना
सोसावे निमूट…
किती समंजसतेने
वागायचे नीट…
*
किती कश्या कश्याचे रे
पेलायचे भार…
शांततेने वादळे नी
सहायचे पूर…
*
किती वाहू द्यावे पाणी
ओंजळीमधून…
किती जगायचे, दार
मनाचे झाकून…
☆
© श्री राजकुमार दत्तात्रय कवठेकर
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
