सुश्री अरुणा मुल्हेरकर
कवितेचा उत्सव
☆ श्रावणमासी… ☆ सुश्री अरुणा मुल्हेरकर ☆
(वृत्त~मनोरमा ~गालगागा गालगागा)
☆
श्रावणाचा मास आला
या धरेला मोद झाला
*
लेवुनी ती गर्द वसने
ठाकलेली हर्षवदने
*
चिंब झाली पावसाने
साज ल्याली या उन्हाने
*
रत्न ही बघ भासताती
या पृथेच्या शालुवरती
*
सोनचाफा गेंद फुलले
केतकीचे पर्ण डुलले
*
गंध पसरे आसमंती
उल्हसीता ही मधुमती
*
इंद्रधनुचे रंग गगनी
रंगमय ही खास धरणी
*
पाहताना रूप सुंदर
मोहवी मन हे खरोखर
☆
© सुश्री अरुणा मुल्हेरकर
डेट्राॅईट (मिशिगन) यू.एस्.ए.
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
