श्री आशिष मुळे
कवितेचा उत्सव
☆ “ती…” ☆ श्री आशिष मुळे ☆
☆
कोण आहे ‘ती’ कोणी सांगू शकेल का
दिसूनी अदृष्य ‘ती’ कोणी पाहू शकेल का
आहेत सर्वश्रुत जागा ‘तिच्या’
‘तिच्या’ पर्यंत कोणी पोहचू शकेल का ||
*
खेळवी कधी राज-प्यादी
रस्त्यात उभी नजर-पारधी
पिवळ्या एका धातूसाठी
बनवी सर्वजनास गारदी ||
*
हिच्यात ‘ती’ नेहमीच वसती
केश साधे पाश भासती
नाजूक त्या ओठांमधुनी
नि:शब्द-बाण जिव्हारी लागती ||
*
हिच्या आतही तुझ्यासारखेच रक्त
हिचे मनही तुझ्यासारखेच व्यक्त
फक्त हिला साथ ‘ तिची ‘
म्हणुनी हिला चंदनाची किंमत ||
*
प्रकृतीही ‘तिलाच’ म्हणती
हिची प्रकृतीही ‘तीच’ असती
मंदिरातूनही त्या अव्यक्ताच्या
सत्ता फक्त ‘तिची’ चालती ||
*
‘तीच ‘ माया अन तिचीच ‘माया‘…
*
पैशात माया प्रेमात माया
मायेत माया कायेत माया
भक्तीत माया व्यक्तीत माया
देवात माया देवळात माया ||
*
‘ तीच ‘ माया अन तिचीच ‘ माया ‘
*
हिच्या जाळ्यात माया
तिच्या काळ्यात माया
हिच्या असण्यात माया
तिच्या नसण्यात माया ||
*
‘तीच‘ माया अन तिचीच ‘माया‘
*
ह्याच्या दृष्टीत साया
हिच्या शब्दात माया
ह्याच्या हृदयात काया
हिच्या कायेत माया…||
☆
© श्री आशिष मुळे
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
