श्री सुजित कदम
कवितेचा उत्सव
☆ एकटी…! ☆
☆
आली बघ चिऊताई आज माझ्या परसात
दाणे टिपुनिया नेई पिल्लांसाठी घरट्यात…!
*
पिल्लासाठी घरट्यात सदा तिचे येणे जाणे
घास मायेचा भरवी चोचीतून मोती दाणे…!
*
चोचीतून मोतीदाणे पिल्ले रोज टिपायची
झाली लहानाची मोठी आस आता उडण्याची…!
*
आस आता उडण्याची आकाशात फिरण्याची
झाले गगन ठेंगणे पिल्ले उडाली आकाशी…!
*
पिल्ले उडाली आकाशी नवे जग शोधायला
एकटीच जगे चिऊ घरपण जपायला…!
☆
© श्री सुजित कदम
मो.7276282626
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
छान आहे कविता