मराठी साहित्य – कवितेचा उत्सव ☆ विजय साहित्य # 246 – राम कवन स्तवन…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 246 – विजय साहित्य

☆ राम कवन स्तवन…! ☆

मालिनी वृत्त.

(करुणाष्टक)

☆

 दशरथतनय ज्याची,

जाहली वंद्य कीर्ती.

रघुकुलतिलक आजी,

भावली‌ बालमुर्ती.

उचित समय येता,

धावला मोक्ष दाता.

दशरथ सदनासी,

जन्मला राम ध्याता…!१

 *

फुलवित पालवीला,

गुंगला वात जेथे .

घडवित बाल लिला,

जन्मला राम तेथे.

चरणकमळ रामा,

देतसे सौख्य छाया.

नमन तुज‌दयाळा,

पाव रे राम राया…! २

 *

अचपळसकळ लीला,

सावळी दिव्य कांती.

नवकमलदल नेत्री,

दाटली विश्वशांती.

अवघड पण‌ साचा,

भंगला चाप आर्या.

जनक सुनयनाची,

कन्यका राम  भार्या…!३

 *

वचन चरण साक्षी,

थांबले भाग्य जेव्हा

भरतसदन गेही,

नांदले सौख्य‌ तेव्हा.

निजसुख टाळणारा,

राम बंधू  मिळावा

सकलसौख्य दायी,

राम चित्ती वसावा…! ४

 *

कवन स्तवन वंदू,

राम नामा मुखाने.

हसत हसत नेतो,

पार नौका सुखाने.

करकमल जयाचे,

वंदितो नित्य धामी.

शरण तुज दयाळा,

धाव रे चक्रपाणी…! ५

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.