कवी राज शास्त्री
☆ साप्ताहिक स्तम्भ – हे शब्द अंतरीचे # 38 ☆
☆ महिमा भक्तीचा… ☆
(अष्ट-अक्षरी… काव्य)
(सदर रचनेमध्ये दोन दुवे आहेत… एक अष्ट-अक्षरी.. आणि दुसरे… अंत्य-ओळ…)
कसे सांगू सांगा तुम्ही
गोड महिमा भक्तीचा
भक्ती-विना होत नाही
मार्ग मोकळा मुक्तीचा…०१
मार्ग मोकळा मुक्तीचा
करा धावा श्रीप्रभुचा
तोच आहे वाली आता
अन्य कोणी न कामाचा…०२
अन्य कोणी न कामाचा
सर्व लोभी आहेत हो
अर्थ असेल तरच
मैत्री, ती करतात हो…०३
मैत्री, ती करतात हो
धर्म हा लोप पावला
अंध-वृत्ती वर आली
सुज्ञ इथेच वेडावला…०४
सुज्ञ इथेच वेडावला
पाश-मोह आवळला
जाण इतुकीही न आता
ज्ञान-दीप मावळला…०५
ज्ञान-दीप मावळला
राज सहज बोलला
कृष्ण-भक्ती, ही सोज्वळ
स्मरा त्या श्रीगोविंदाला …०७
© कवी म.मुकुंदराज शास्त्री उपाख्य कवी राज शास्त्री.
श्री पंचकृष्ण आश्रम चिंचभुवन, वर्धा रोड नागपूर – 440005
मोबाईल ~9405403117, ~8390345500
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
