कवितेचा उत्सव
☆ बहुरूपी…. ☆ श्री हरिश्चंद्र कोठावदे ☆
(वृत्त :पादाकुलक)
शब्दचि वक्ता शब्द प्रवक्ता
जातिवंत हा श्रवणभक्तही
रसवंतीचे सुरम्य गुंजन
दिव्य सृष्टिचे भव्य दृश्यही !
काळोखाचा दर्दी वाचक
शब्द उपासक तेजाचाही
संधिप्रकाशी धूसर अंधुक
अनाम एका विश्वाचाही !
शब्द कधिकधी सुगम्य साधा
जसा जळावर तरंग वरवर
अतींद्रियाच्या अथांग डोही
ओढुन नेई कधी खोलवर !
शब्द सुगंधी फूल मुलायम
सृजनदूतही , प्रलयंकरही
प्राणामधल्या अंगारांवर
संततधारी करुणाघनही !
अनुभूतीशी इमान निष्ठा
व्रत शब्दाचे हेच निरंतर
कधी परिमळे मातीतुनही
कवेत घेई कधी दिगंतर !
सतरंगी नभ शब्दप्रभूंचे
शब्द बहुरुपी त्यांच्यासंगे
सुखदुःखांचा करुणरम्य रे
उत्सव रंगे शब्दासंगे !
© श्री हरिश्चंद्र कोठावदे
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
