श्री हरिश्चंद्र कोठावदे
कवितेचा उत्सव
☆ मी सांगतो कथा जी… ☆ श्री हरिश्चंद्र कोठावदे ☆
(वृत्त: शुद्ध सती मात्रा:८+४)
मी सांगतो कथा जी
तुमचीच रे कहाणी
तुमचेच हुंदके हे
तुमचीच ही विराणी !
आमंत्रणाविनाही
येतो कबीर दारी
गीतात नित्य वाजे
त्याचीच एकतारी !
ती दूरची तुफाने
त्यांचीहि गाज श्रवणी
वणव्यात दूर राने
त्यांचीहि राख कवनी !
तारा अनाम कोणी
माझा प्रकाश होतो
शब्दांस चांदण्याचे
आभाळ एक देतो !
त्या पैलपार हाका
भरती शिडात वारा
त्यांचीच ही कृपा की
कधि लाभतो किनारा !
मातीतल्या कहाण्या
झाल्या दिगंत काही
त्यांचीच मंत्रबाधा
या अक्षरांस काही !
जादू भगीरथांची
ये ओंजळीत गंगा
करी कोरडे निमित्त
घेण्यास श्रेय दंगा !
© श्री हरिश्चंद्र कोठावदे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
