श्री आशिष बिवलकर
चित्रकाव्य
– ती… – ☆श्री आशिष बिवलकर ☆
☆
डौलदार ऐटीत चाल ,
दिसतेय तुझी ग लेकी |
रॅम्पवॉकवर चालणारी मॉडेल
तुझ्यापुढे पडेल फिकी |
*
कळशीभर पाण्यासाठी दाही दिशा,
चिमुकले चाले तुझी वणवण |
छोटीशी कळशी हातात घेउन,
तुझ्याच सारख्या कित्येक जण |
*
नुसती आश्वासने देऊन,
तोंडाला पानं पुसली जातात |
पिढ्यानं पिढ्या हेच चाले,
समस्या जिथल्या तिथेच राहतात |
*
कळशी पाण्याने भरेल की नाही,
कुठे नाही त्याची कसली शाश्वती |
डोळे अश्रूंनी नक्कीच भरतील,
मिळवलेल्या स्वातंत्र्याची फलश्रुती |
*
गावोगावी कोवळ्या कळ्या,
पाण्यासाठी मैलोन्मैल भटकतात |
योजनांच्या झारीतील शुक्राचार्य,
मलिदा खाऊन खुर्चीला चिकटतात |
*
कोरडा दुष्काळ आवडे सर्वांना,
लाटती मयताच्या टाळूवरचे लोणी |
हंडाभर पाण्यासाठी पायपीट,
वाली न उरला व्यवस्थेत कोणी |
*
प्रजासत्ताकाचे अमृत वर्षं,
अमृत सोडा पाणी ही राहिले दूर |
जाहिरातबाजीचे उधळतात घोडे,
धुराळा उडवीत दौडती खूर |
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
