मराठी साहित्य – चित्रकाव्य ☆ सांग परीक्षा कितीदा घेशील ? ☆ सुश्री नीलांबरी शिर्के ☆

  चित्रकाव्य  

☆

आभाळाला हात जोडूनी

केली होती मीच विनवणी

मशागत करूनी जे पेरले

तव येण्याने येई तरारुनी

*

 उशीर झाला जरी यायला

 धरती मनसोक्त भिजली

 पेरलेल्या सशक्त बीजाला

 पीकरूपाने देई भरूनी

*

 टपोर मोती रास शिवारी

 घरदार सारे हरखून गेले

भरून न्यायचे घरात आता

आभाळ ढगांनी भरून गेले

*

 हात जोडतो पुन्हा आभाळा

 आता मात्र तू पडू नको रे

 घरदार राबले इथे रातदिन

 इतकी परीक्षा पाहू नको रे

*

 पडशील शेतामध्ये जरी तू

 डोळ्यातून नित्य वाहशील

 प्रामाणिक कष्टाची आमची

 सांग परीक्षा कितीदा घेशील

☆

©  सुश्री नीलांबरी शिर्के