मराठी साहित्य – मनमंजुषेतून ☆ एक स्टाफ रुम…..☆ सौ. सुचित्रा पवार

सौ. सुचित्रा पवार

 मनमंजुषेतून 

☆ एक स्टाफ रुम ☆ सौ. सुचित्रा पवार ☆

शुभ्र आच्छादनाखाली निश्चेष्ट, प्रेतवत पहुडल्या गाद्या उचलताना

तो मिश्किल हसत रहातो —-

इतस्ततः पसरलेल्या कागदी बोळ्यांना, चुरगळलेल्या कागदी कपांना

शेंगांच्या फोलांना अन फळांच्या सालींना

प्रश्न एक विचारतो —-

“घरेही यांची अशीच असतात का ? स्वच्छतेचे धडे देणारे गुरू न गुरुमाऊली

सार्वजनिक स्वच्छतेचे धडे स्वतः गिरवत नसतात  का ?—-

कुबट गाद्या कुत्सित हसून साक्ष देतात—

डेस्कवरील चहाचे चिकट डाग ओठ गच्च मिटतात !

पांचट विनोद ,राजकारण अन गावगप्पांचे आवाज हिंदळत राहतात भिंतीवर —-

ऑफ तासाला चघळत नाहीत कुणी–  विद्यार्थ्यांचे  जटील प्रश्न जिभेवर !

चटकदार खमंग वास अधून मधून दरवळतात भिशी पार्टीचे—

चघळत असतो कुणी शिष्य–डब्यातले कोरडे घास  चटणी भाकरीचे—-

“विठ्ठल नामाची शाळा भरली …” दूरवरून एक आवाज रेंगाळतो कानावर–

कल्पनेतली शाळा आकार घेते मनावर–

झटकतो आच्छादन अन मनातले विचार—

शिपाई तो शाळेतला निमूटपणे करतो–  शेवटी रूढ पायंडयाचा  स्वीकार !!

© सौ.सुचित्रा पवार 

तासगाव, सांगली

8055690240

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈