मराठी साहित्य – मराठी कविता ☆ कवितेच्या प्रदेशात # 129 ☆ गझल… ☆ सुश्री प्रभा सोनवणे ☆

सुश्री प्रभा सोनवणे

☆ गझल… ☆

शुद्ध पाण्या सोबतीही गाळ आला होता

चांगल्या मित्रा,तुझ्यावर आळ आला होता

चालताना थांबले मी त्या तिथे एकांती

ओळखीचा तो सुरंगी माळ आला होता

सातबारा दावला मी शेत होते माझे

बांगड्या भरण्यास की वैराळ आला होता

मर्द माझ्या मावळ्यांचे भाट गाती गाणे

झुंजले शर्थीत तेव्हा काळ आला होता

चौकटी मोडाच सा-या या ठिकाणी येण्या

विसरुनी जाऊ इथे चांडाळ आला होता

© प्रभा सोनवणे

२२ एप्रिल २०२२

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011