सुश्री मंजुषा सुनीत मुळे
वाचताना वेचलेले
☆ आक्रोश…..(कविता)….प्रमोद जोशी ☆ प्रस्तुती – सुश्री मंजुषा सुनीत मुळे ☆
मातीवरचा आक्रोश आता,
आकाशात पण नाही मावत !
बातमी केवढा आघात करते,
“आता नाहीत बिपिन रावत !”
नुसतंच शौर्य नव्हते रावत,
तिन्ही दलात समन्वय !
किती वीर रोज जातात,
तरी होत नाही सवय !
दर दिवशीच एकेक तारा,
उल्का होऊन पडत आहे !
खरंच गळ्यात हुंदका म्हणून,
एकेक घास अडत आहे !
शौर्य तिथेच घात असतो,
गांडुळं काय फिरतात कमी?
त्याना गाठू शकेन अशी,
यमालाही नसते हमी !
उंचावरती जाणंच सांगतं,
इंचा-इंचावरती धोके !
लोणी खावून जमिनीवरती,
खादीत निर्धोक,खादाड बोके !
चालती बोलती तटबंदीच ही,
“भारत-गड” सुखरुप ठेवते !
हुतात्म्यांच्या माळेमधे,
आपल्या सर्वस्वालाच ओवते !
काळालाही हेवा वाटतो,
म्हणून दगा हवेत देतो !
साक्षात् देव आसन सोडून,
असे वीर कवेत घेतो !
असह्य नि असहाय म्हणजे,
काय याचा अनुभव क्रूर !
पापणी सोडून एकेक थेंब,
त्यांच्यासोबत चाललाय दूर !
-प्रमोद जोशी.देवगड.
9423513604
संग्राहक – मंजुषा सुनीत मुळे
९८२२८४६७६२.
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
