सुश्री मंजुषा सुनीत मुळे
वाचताना वेचलेले
☆ नववर्षाला नवा प्रणाम ☆ प्रस्तुती – सुश्री मंजुषा सुनीत मुळे ☆
युगे युगे क्रीडेत रंगले
अवकाशाचे असीम अंगण
तेजोनिधिभोवती फिरतसे
अचूक ग्रहगोलांचे रिंगण.
धूमकेतुही येती जाती
नक्षत्रांच्या रचना सुंदर
उल्का तेजे क्षणिक तळपती
खेळ चालला असा निरंतर
मंथर गती या वसुंधरेची
साथीला छोटासा चंदर
प्रदक्षिणेची होता पूर्ती
म्हणतो आले नव संवत्सर
दिन रजनीचे येणे जाणे
सहा ऋतूंचे सहा तराणे
गतीमान त्या हिंदोळ्यावर
तुमचे अमुचे झुलते जगणे.
आदि अंत ना या खेळाला
वर्ष संपता स्वल्पविराम
वळणावर या थांबून करुया
नववर्षाला नवा प्रणाम !
संग्रहिका – सुश्री मंजुषा सुनीत मुळे
९८२२८४६७६२
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
