श्री सुजित कदम
☆ साप्ताहिक स्तंभ – सुजित साहित्य #74 ☆
☆ आई…! ☆
माझ्यासाठी किती राबते माझी आई
जगण्याचे मज धडे शिकवते माझी आई
तिची कविता मला कधी ही जमली नाही
अक्षरांची ही ओळख बनते माझी आई…!
अंधाराचा उजेड बनते माझी आई
दु:खाला ही सुखात ठेवे माझी आई
कित्तेक आले वादळ वारे हरली नाही
सूर्या चा ही प्रकाश बनते माझी आई…!
देवा समान मला भासते माझी आई
स्वप्नांना ही पंख लावते माझी आई
किती लिहते किती पुसते आयुष्याला
परिस्थिती ला सहज हरवते माझी आई…!
ठेच लागता धावत येते माझी आई
जखमेवरची हळवी फुंकर माझी आई
तिच्या मनाचे दुःख कुणाला दिसले नाही
सहजच हसते कधी न रडते माझी आई…!
अथांग सागर अथांग ममता माझी आई
मंदिरातली आहे समई माझी आई
माझी आई मज अजूनही कळली नाही
रोज नव्याने मला भेटते माझी आई…!
© सुजित कदम
पुणे, महाराष्ट्र
मो.७२७६२८२६२६
