मराठी साहित्य – कविता ☆ विजय साहित्य #131 – ☆ उषःकाल ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 131 – विजय साहित्य

☆ उषःकाल ☆ कविराज विजय यशवंत सातपुते ☆

संत कबीर मार्मिक

पुरोगामी संत कवी

समाजात सुधारणा

भक्ती मार्गी शैली नवी…! १

तत्कालीन समाजाचे

केले सूक्ष्म निरीक्षण

कलंदर व्यक्तीमत्व

दोहा छंद विलक्षण….! २

पदे निर्भय साहसी

दृष्टांताचे युक्तिवाद

प्रथा अनिष्ट मोडून

प्रेमे साधला संवाद….! ३

धर्मरूप मुळ तत्त्वे

मानव्याचा पुरस्कार

हिंदू मुस्लिम कबीर

अनुयायी आविष्कार…! ४

एका एका रचनेत

धर्म निरपेक्ष वाणी

कर्म सिद्धांताची मेख

प्रतिभेची बोलगाणी….! ५

अंधश्रद्धा कर्मकांड

दाखविले कर्मदोष

कडाडून केली टिका

मानव्याचा जयघोष…! ६

सनातनी बुवाबाजी

भोंदू बाबा केला दूर

वटवृक्षी दोह्यातून

सत्यनिष्ठ शब्द सूर…! ७

संत कबीर साहित्य

जणू जीवन आरसा

सुफी अद्वैत योगाचा

दिला मौलिक वारसा…! ८

संत कबीर दोह्यांचे

करूयात आकलन

प्रेममयी भक्तीभाव

निजरूप संकलन…! ९

सुर छंद लय ताल

गुंग होई भवताल

संत कबीर स्मरण

सृजनाचा उषःकाल..! १०

© कविराज विजय यशवंत सातपुते