मराठी साहित्य – कविता ☆ विजय साहित्य #133 ☆ गुरुपौर्णिमा…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 133 – विजय साहित्य

☆ गुरुपौर्णिमा…! ☆ कविराज विजय यशवंत सातपुते ☆

ज्ञानार्जन,  ज्ञानदान

नित्य हवे देणे घेणे

शिकविते चराचर

ज्ञान सृजनाचे लेणे. . . . !

गुरू रूप ईश्वराचे

जगण्याचा मार्ग देते.

कृपा प्रसादे करून

सन्मार्गाच्या पथी येते. . . . . !

गुरू ईश्वरी संकेत

संस्काराची जपमाळ

शिकविते जिंकायला

संकटांचा वेळ,  काळ. . . . . !

चंद्र  प्रकाशात जसे

तेज चांदणीला येते

पौर्णिमेत आषाढीच्या

व्यास रूप साकारते.. . . !

माणसाने माणसाला

घ्यावे जरा समजून

ऋण मानू त्या दात्यांचे

गुरू पुजन करून. . . . !

संस्काराचा  ज्ञानवसा

एक हात देणार्‍याचा

पिढ्या पिढ्या चालू आहे

एक हात घेणार्‍याचा.

असे ज्ञानाचे सृजन

अनुभवी धडे देते

जीवनाच्या परीक्षेत

जगायला शिकविते. . . !

ज्ञानियांचा ज्ञानराजा

व्यासाचेच नाम घेई.

महाकाव्ये , वेद गाथा

ग्रंथगुरू ज्ञान देई. . . . !

© कविराज विजय यशवंत सातपुते