मराठी साहित्य – कविता ☆ विजय साहित्य #137 ☆ श्रावण साकव…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 137 – विजय साहित्य

☆ श्रावण साकव…! ☆ कविराज विजय यशवंत सातपुते ☆

झुले पंचमीचा झुला

श्रावणाची घाली साद

लेक  आली माहेराला

सृजनाचे पडसाद …१

सणवार नेम धर्म

सातवार सणवार

सडा रांगोळीचा थाट

कुळधर्म कुलाचार …२

श्रावणाचे सारामृत

नाग पंचमीचा सण

हळवेल्या आठवात

हिंदोळ्यात झुले क्षण…३

वसुंधरा धरी फेर

झिम्मा फुगडीचा खेळ

आली गौराई  अंगणी

जीव शीव ताळमेळ….४

ब्रम्ह, कृष्ण कमळाचा

श्रावणात दरवळ

रंग गंधात नाहला

अंतरीचा परीमळ….५

न्यारा श्रावण श्रृंगार

नथ, पैठणीचा साज

सालंकृत अलंकार

भवसागराची गाज…६

सातवार सातसण

आली नारळी पुनव

रक्षा बंधनी गुंतला

न्यारा श्रावण साकव   …७

© कविराज विजय यशवंत सातपुते