मराठी साहित्य – कविता ☆ साप्ताहिक स्तम्भ – विजय साहित्य – धर्मवीर संभाजी महाराज जयंती विशेष – धर्मवीर शंभू ☆ कविराज विजय यशवंत सातपुते

संस्कृत पंडित  । स्वराज्याचे वीर ॥

ज्ञानी शाक्तवीर   । शंभू राजे ॥ 1 ॥

नखशिख आणि   | सात सतकाचे ॥

बुधभुषणाचे । ग्रंथकार ॥ 2 ॥

भाषा व्याकरण  | धर्मशास्त्र निती ॥

तत्वज्ञान रिती । अभ्यासिली ॥ 3 ॥

धर्मवीर शंभू  । ओलीस राहिले ॥

संघर्ष साहिले ।  मोगलांचे ॥ 4 ॥

मल्लखांब कुस्ती   । मर्दानी खेळात॥

आखाडे  मेळ्यात  । तरबेज ॥ 5 ॥

सप्त हजाराचे  | मनसबदार ॥

कर्तृत्वास धार  | दशवर्षी ॥ 6॥

संभाषण कला | मुत्सद्दी पणाचे ॥

धर्म रक्षणाचे  |  बाळकडू ॥7 ॥

यवनी गोटात | शिरूनी जाणले॥

जेरीस  आणले ।  औरंग्यास ॥ 8॥

शिवाजी नंतर । स्वराज्य रक्षण  ॥

केले संरक्षण    ।  रयतेचे  ॥ 9 ॥

संभाजी राजांची  । येसूबाई राणी॥

कर्तृत्वाच्या खाणी  ।  स्वराज्यात   ॥ 10 ॥

कुलमुखत्यार  । राणी येसूबाई ॥

स्वराज्याची माई  ।  शंभू भार्या ॥ 11 ॥

भेदरला काळ ।  विरश्री मरण॥

संभाजी स्मरण । स्फूर्तीदायी   ॥ 12 ॥

(श्री विजय यशवंत सातपुते जी के फेसबुक से साभार)

© विजय यशवंत सातपुते