कविराज विजय यशवंत सातपुते
☆ साप्ताहिक स्तम्भ # 73 – विजय साहित्य – आराधना .. . ! ☆ कविराज विजय यशवंत सातपुते ☆
आराध्याचे आराधन
हीच खरी आराधना
जाण ठेवूनी करावी
आदर्शाची जोपासना. . . !
आराधना करताना
नको मनी अहंकार
मनोमन चिंतलेली
होई कामना साकार. . . . !
प्रेम प्रितीमध्ये हवी
विश्वासाची आराधना.
जुळुनीया येई नाते
हवी मनी संवेदना. . . . !
कुणीतरी कुणासाठी
जीव जातो लावूनीया
आराधना अंतरीची
जाई श्वास होऊनीया . . . . !
आराधने मध्ये हवे
एक माथा, दोन हात
प्रार्थनेच्या आरंभाला
आराधना तेलवात.. . !
ध्येयपूर्ती आराधना
प्रयत्नांची हवी जोड
ज्ञान मिळवोनी साधू
यशकिर्ती बिनतोड. . . . !
© विजय यशवंत सातपुते
यशश्री, 100 ब दीपलक्ष्मी सोसायटी, सहकार नगर नंबर दोन, पुणे 411 009.
मोबाईल 9371319798
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
