मराठी साहित्य – कविता ☆ साप्ताहिक स्तम्भ # 104 – नाती जपूया ☆ कविराज विजय यशवंत सातपुते

कविराज विजय यशवंत सातपुते

साप्ताहिक स्तम्भ # 104 – विजय साहित्य

☆ नाती जपूया ☆ कविराज विजय यशवंत सातपुते ☆

आद्य गुरू मायबाप

स्थान त्यांचे अंतरात

नाती जपूया प्रेमाने

भावस्पर्शी काळजात …१

आज्जी आजोबा घराचे

सौख्य समृध्दी दालन

तत्त्वनिष्ठ संस्कारांचे

ध्येयवादी संकलन … २

काका, काकू, मामा,मामी

आत्या मावशीचा बोल

कधी धाक , कधी लाड

भावनांचा समतोल …३

मित्र मैत्रिणीचे नाते

काळजाचा गोतावळा

सुख दुःख समाधान

असे उरी कळवळा …४

नाते बंधु भगिनींचे

वैचारिक छत्रछाया

घास अडतसे ओठी

धावतसे प्रेममाया …  ५

नाते सहजीवनाचे

लेणे सासर माहेर

नाती जपूया प्रेमाने

देऊ काळीज आहेर…६

© कविराज विजय यशवंत सातपुते