मराठी साहित्य – कविता ☆ साप्ताहिक स्तम्भ #122 – विजय साहित्य – जीवनवेणू ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 122 – विजय साहित्य

☆ जीवनवेणू ☆ कविराज विजय यशवंत सातपुते ☆

(दशाक्षरी रचना)

सप्तसुरांची, अवीट गोडी

या जीवनाच्या, सुरावटीला

जगणे आहे ,मंजुळ पावा

सुखदुःखाच्या, सजावटीला….! १

नको फुकाचे, मानपान ते

माणूस होतो, माणूस राहू

हात देऊया, संकट काळी

ईश्वर भक्ती, जनांत पाहू….! २

वाचू माणूस,जाणू माणूस

वृद्धाश्रम तो , दूर ठेऊया

जीवन यात्रा, माय पित्यांची

सवे आपुल्या, सुखे नेऊया…! ३

गुरू जनांची, ज्ञान शिदोरी

पाया भरणी, विचारधारा

प्रलोभनांचे , नको दागिने

व्यसनी संगा, नकोच थारा…! ४

जबाबदारी, अन् कर्तव्ये

डावे उजवे, हात आपुले

न्याय नितिचे, विचार सोपे

ध्येयवादी ही,टाक पाऊले…! ५

काय सांगते, जीवन वेणू

मनी वाहू दे, प्रेमळ वारा

सात सुरांची,सुरेल वाणी

अनुभूतींची, जीवनधारा….! ६

© कविराज विजय यशवंत सातपुते