सुश्री नीलाम्बरी शिर्के
प्रकाशित पुस्तके –स्पंदन ,आत्मधून
आवड – वाचन, लिखाण, प्रवास, मैत्र जपणे, काव्यवाचन, व्याख्याने देणे
☆ कवितेचा उत्सव ☆ पापण्यातील आसवांना ☆ सुश्री नीलाम्बरी शिर्के ☆
पापण्यातील आसवांना
बांध पक्का बांधला
वाहतो जलौघ वेगे
तोल सावरून आतला
काळजातील यातना
अंतरातच कोंडल्या
तडकल्या भिंती जिथे
धीर धरूनी सांधल्या
थेंबही आता न येतो
पापणी काठावरी
हुंदक्यांना धाडले
काळजाच्या अंतरी
ओठांवरती विराजे
धीरगंभीर हास्यरेषा
जीवनाला कळाली
जिंदगीची गूढ भाषा
© सुश्री नीलांबरी शिर्के
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
शिर्के यांची कविता आवडली