सुश्री त्रिशला शहा
कवितेचा उत्सव
☆ स्वरलता ☆ सुश्री त्रिशला शहा ☆
(जन्मदिवस निमित्त)
भारतमातेच्या शिरपेचातील
एक हिरकणी लखलखणारी,
साऱ्या जगाला व्यापून उरली,
होती नभीची शुक्रचांदणी,
स्वर तिचा होता अद्वितीय,
गळ्यात वसला होता गंधार खरोखर,
अवघ्या जनतेला पडला त्या स्वरांचा मोह,
वैराण जीवनातही ठरला संजीवन,
अंगाईने बाल्य जोजविले,
प्रेमगीतातून तारुण्य फुलले,
भक्तीरसाने वार्धक्य रिझविले,
भैरवीचे सूर आसमंती निनादले,
तिच्या स्वराने सुवर्ण उधळले,
मनामनात मोहर उमलले,
भारताची ती स्वरसरीता,
अभिमान आहे आम्हा तयाचा,
पदवी मिळाली तिज गानकोकिळा,
पुरस्कारांचा वर्षाव नुसता,
जन्मदिन आज त्या भारतरत्नाचा,
अभिवादन माझे
त्या लतादिदींना… 🙏🏻
© सुश्री त्रिशला शहा
मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
