श्री आशिष मुळे
कवितेचा उत्सव
☆ माझे फूल… ☆ श्री आशिष मुळे ☆
जगण्याच्या त्या निरर्थक कोलाहलात
फूल एक उभे गर्दीतल्या एकांतात।
देणगी त्यासी सुंदर कोमलतेची
किनार पुसट त्याला असहायतेची।
सोसे बहू संघर्षाच्या जीवनात
फरक नाहीं त्याच्या सुवासात।
असती जरी काटे स्वभावात
दडले मुळ त्यांचे अनुभवात।
येती भुंगे कोमल सहवासात
चोरूनी मधुपर्क नेती विरहात।
त्यापरी वाटे फ़ुलदाणीत शोभावे
त्यासी लागत असे खुडावे।
प्रश्न कोमल जीवास कसोटीचा
इकडे आडाचा तिकडे विहिरीचा।
मज सतावे व्यथा त्या उत्तराची
तुर्तास देतो साथ एका आश्रुची॥
© आशिष मुळे
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
