श्रीमती रंजना मधुकरराव लसणे
कवितेचा उत्सव
☆ रंजना जी यांचे साहित्य # 134 – हा भास दो घडीचा ☆
प्रेमात रंगलो मी । हा भास दो घडीचा।
खोटेच भाव सारे। आभास दो घडीचा।
हे स्वप्न भाव वेडे। देऊ नको कुणाला।
स्वप्नात रंगलेला हा रास दो घडीचा।
या भाबड्या मनाला। समजाविता कळेना।
या बेगडी फुलांचा। हा वास दो घडीचा।
भाळू नको उगा रे। खोट्याच कल्पनांना ।
संपेल हा कधीही ।सहवास दो घडीचा ।
जादूत धुंद होशी।स्वप्नातल्या परीच्या।
येशील भूवरी रे। हा ध्यास दो घडीचा ।
सौंदर्य या मनाचे। जाणून घेई आता।
प्रेमास लाभलेला।विश्वास दो घडीचा
© रंजना मधुकर लसणे
आखाडा बाळापूर, जिल्हा हिंगोली
9960128105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
