महंत कवी राज शास्त्री
हे शब्द अंतरीचे # 120
☆ माणुसकीची गुढी… ☆
माणुसकीची, गुढी उभारू
विकल्प मनीचा, सहज संपवू
आत्म-परीक्षण, करता आपण
माणुसकीला, सदैव टिकवू.!!
माणुसकीची, गुढी उभारू
भेदभाव मिटवून टाकू
अंधश्रद्धा, झुगारुनिया
तनमन राष्ट्रहितार्थ झोकू.!!
माणुसकीची, गुढी उभारू
एकमेका सहाय्य करू
स्वार्थ-विरहीत, जीवन जगता
सु-संकल्प पताका, हाती धरू.!!
माणुसकीची, गुढी उभारू
राग-द्वेषा, तिलांजली देऊ
एकदाच येणे, भू-तलावर
काही चांगले, करुनी जाऊ.!!
माणुसकीची, गुढी उभारू
थोरांचा तो, आदर्श घेऊ
अनेक जाहले, शूरवीर येथे
तयांचे शुद्ध, पोवाडे गाऊ.!!
माणुसकीची, गुढी उभारू
कवी राज मनी, हेच चिंती
पूर्ण आयु, ईश्वर चिंतन
असेलच मग, कुठलीच भीती.!!
© कवी म.मुकुंदराज शास्त्री उपाख्य कवी राज शास्त्री
श्री पंचकृष्ण आश्रम चिंचभुवन, वर्धा रोड नागपूर – 440005
मोबाईल ~9405403117, ~8390345500
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ.गौरी गाडेकर≈
