श्री सुजित कदम
कवितेचा उत्सव
☆ सुजित साहित्य # 153 ☆ संत विसोबा खेचर… ☆ श्री सुजित कदम ☆
संत विसोबा खेचर
करीतसे सावकारी
कापडाचे व्यापारी ते
वीरशैव निरंकारी…! १
वारकरी संप्रदाय
संत सज्जनांचा सेतू
विठू भेटवावा गळा
साधा सोपा शुद्ध हेतू…! २
ज्ञाना निवृत्ती सोपान
मुक्ताईचा द्रेष करी
मांडे भाजताना पाही
ज्ञानदेवा गुरू करी…! ३
सन्मानीले मुक्ताईस
विसरोनी अहंकार.
भक्ती योग चैतन्याचा
लिंगायत अंगीकार…! ४
योगविद्या अवगत
नामदेवा उपदेश
अवकाशी फिरे मन
नाव खेचर विशेष..! ५
उचलोनी ठेव पाय
जिथे नाही पिड तिथे
गुरू विसोबा तात्विक
नामदेवा लावी पिसे…! ६
देव कृपा सहवास
तिथे भक्ता हवे काय
शंकराच्या पिंडीवर
गुरू विसोबांचे पाय..! ७
निराकार नी निर्गुण
पांडुरंग भेटविला
परब्रम्ह साक्षात्कार
विसोबांनी घडविला…! ८
लिंगायत साहित्यात
तत्व चिंतन पेरून
केले जन प्रबोधन
परखड वाणीतून …! ९
शिव मंदिरी बार्शीत
संत विसोबा समाधी
योग आणि परमार्थ
दूर करी चिंता व्याधी…! १०
© सुजित कदम
संपर्क – 117, विठ्ठलवाडी जकात नाका, सिंहगढ़ रोड,पुणे 30
मो. 7276282626
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
