सौ. प्रतिभा संतोष पोरे
परिचय
शिक्षण – एम् एस्सी. बी एड, योगशिक्षक डिप्लोमा, एम.ए योगशास्त्र.
छंद – वाचन, कविता, कथा, बालनाट्य इ. लेखन
पुरस्कार – योगभूषण (२०२१), चारूतासागर प्रतिष्ठान तर्फे – उत्कृष्ट कथा पुरस्कार – (२०२३)
कवितेचा उत्सव
☆ पाळणा कवितेचा… ☆ सौ. प्रतिभा संतोष पोरे ☆
✒️
पहिल्या दिवशी आली जन्मासी।
शब्दकळी जणू अलगद फुलसी।
नवरसांच्या धारा बरसती जो बाळे जो जो गे जो।१।
✒️
दुसऱ्या दिवशी जुळली अक्षरे
शब्दांतून सुंदर अर्थ निघे रे
लघुगुरूंचे पडसाद खरे जो बाळे जो जो गे जो ।२।
✒️
तिसऱ्या दिवशी मनातील कचरा
उमटती शब्द होतसे निचरा
शब्दब्रम्हाने अंतरी शुद्धता जो बाळे जो जो गे जो ।३।
✒️
चौथ्या दिवशी साधले यमक
संवेदनशीलतेचे असे गमक
वाचकांसी लाभे सुख अमूप जो बाळे जो जो गे जो ।४।
✒️
पाचव्या दिवशी कविता सजली
शीर्षक देता गालात हसली
अलंकार नि वृत्ताने बहरली जो बाळे जो जो गे जो ।५।
✒️
सहाव्या दिवशी शब्द मधाळ
वाणीने वदता बहु रसाळ
प्रतिभेचा हा रम्य अविष्कार जो बाळे जो जो गे जो ।६।
✒️
सातव्या दिवशी मोठा गर्भितार्थ
समीक्षकासी ना सापडे अर्थ
करी लेखणी कवी होई प्रख्यात ।
जो बाळे जो जो गे जो ।७।
✒️
© सौ. प्रतिभा पोरे
पत्ता – ‘सोनतुकाई’, शांतीसागर कॉलनी, सांगली – भ्रमणध्वनी क्रमांक – ८७८८४५८६२४
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
