मराठी साहित्य – कवितेचा उत्सव ☆ विजय साहित्य #194 ☆ पुर्णान्न भाकर…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 194 – विजय साहित्य

☆ पुर्णान्न भाकर…! ☆ कविराज विजय यशवंत सातपुते ☆

☆

आग पोटाची शमवी

अशी पुर्णान्न भाकर

शाळू,नाचणी,तांदूळ

पोट भरीतो चाकर…! १

हातावर पोट ज्यांचे

भाजी भाकरी मिळावी

शिळी किंवा ताजी असो

सुख शांती मेळवावी…! २

भुक अन्नाची भागते

कोरभर भाकरीत

राबे अहोरात्र कुणी

कष्टमय चाकरीत…!३

जात्यावरी घरघर

पीठ भाकरीचे येई

चुलीवर शेकताना

घरादारा अन्न देई…! ४

भाकरीच्या चंद्रासाठी

हात आईच जळालं

दारीद्रयाचं दुःख मोठं

दारी मागल्या पळालं..! ५

भाजी चटणीची जोड

कधी दुधातला काला

खरपूस भाकरीचा

असे हरी रखवाला….! ६

बाल तरूण वार्धक्य

होई वेळेला‌ हजर

औक्षवंत लेकरांची 

काढे भाकरी नजर…! ७

अशी भाकरी भाकरी

जेवणात रोज हवी

रूचकर स्वादातून

देई ताकद ती नवी..! ८

☆

© कविराज विजय यशवंत सातपुते