श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 211
☆ वयात आले… ☆ श्री अशोक श्रीपाद भांबुरे ☆
☆
फूलपाखरा तुझे चालणे वयात आले
नव्या फुलांचे नवे डोलणे वयात आले
तू हृदयाचे चिन्ह कोरले हातावरती
तेव्हा कळले तुझे वागणे वयात आले
पहिल्यांदा मी गालावरची खळी पाहिली
जाणवले मज तुझे लाजणे वयात आले
नजरेमधल्या शब्दांनाही कंठ लाभला
डोळ्यांमधले अजब बोलणे वयात आले
अश्वावरची गोंडस मूर्ती टिपल्यानंतर
श्वासामधले शीघ्र धावणे वयात आले
रंग बिरंगी पंखावरची धूळ नभावर
आकाशातिल धुंद चांदणे वयात आले
जिथे भेटले पवन-गंध ती बाग असावी
दोघांमधले आज भेटणे वयात आले
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
