सौ. प्रतिभा संतोष पोरे
कवितेचा उत्सव
☆ अंधश्रद्धा… ☆ सौ. प्रतिभा संतोष पोरे ☆
✒️
डोक्यावर वाढतो प्रचंड
केसांच्या जटाचा भार
खाजवून ना शमे वेदना
असतो उवांचा बाजार ।१।
✒️
जीवन देणारा दाता प्रभू
पोषणाची करी फिकीर
मागेल का तो कधी बळी
कोंबड्या, बकऱ्यांचे शीर ।२।
✒️
लिंबू, मिरची बांधून गाडीला
थांबले का जीवघेणे अपघात
देवदासी बनवून छोट्या मुलीला
होतोय तिच्या जीवनाचा घात ।३।
✒️
मांजर आडवे गेले म्हणून
सोडतात कामे महत्त्वाची
काळी बाहुली लावून दारी
माघारी फिरे का दृष्ट कुणाची ।४।
✒️
पती मरता जर अचानक
पत्नी होई पांढऱ्या पायाची
खरी श्रद्धा गाडून मातीत
अंधश्रद्धा ही रीत जगाची ।५।
✒️
घेऊन हाती शस्त्र शब्दांचे
मोडून काढू वाईट रिती
कापून जटा, फेकून लिंबू
मुक्त जीवनी जडू दे प्रिती ।६।
✒️
देऊ सोडून अशास्त्रीय गोष्टी
करू निर्मूलन अंधश्रध्देचे
परमेश्वराशी राहू कृतज्ञ
रोप वाढवू डोळस श्रद्धेचे ।७।
✒️
© सौ. प्रतिभा पोरे
पत्ता – ‘सोनतुकाई’, शांतीसागर कॉलनी, सांगली – भ्रमणध्वनी क्रमांक – ८७८८४५८६२४
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
