श्री सुजित कदम
कवितेचा उत्सव
☆ सुजित साहित्य # 179 ☆ वातानुकुलित… ☆ श्री सुजित कदम ☆
एका आलिशान वातानुकुलीत
दुकानाच्या आत
निर्जीव पुतळ्यांना
घातलेल्या रंगीबेरंगी
कपड्यांना पाहून,
मला माझ्या बापाची
आठवण येते…
कारण,
मी लहान असताना,
नेहमी माझ्यासाठी
रस्त्यावरून कपडे खरेदी
करताना,
माझा बाप माझ्या
चेह-यावरून हात
फिरवून त्याच्या
खिशातल्या पाकिटाला
हात लावायचा…
आणि
वातानुकुलीत
दुकानातल्या कपड्यांपेक्षा
रस्त्यावरचे कपडे
किती चांगले असतात
हे किती सहज
पटवून द्यायचा…
खिशातलं एखादं चाॅकलेट
काढून तेव्हा तो हळूच
माझ्या हातात ठेवायचा…
आणि
माझ्या मनात भरलेले कपडे
तेव्हा तो माझ्या नजरेतूनच ओळखायचा…
आम्ही कपडे खरेदी करून
निघाल्यावरही
माझा बाप चार वेळा
मागं वळून पहायचा
आणि
“एकदा तरी आपण
ह्या आलिशान दुकानातून कपडे
खरेदी करू”
इतकंच माझ्याकडे पाहून
बोलायचा…
पण आता,
मला त्या निर्जीव पुतळ्यानां घातलेल्या..
रंगीबेरंगी कपड्यांच्या
किंमतीचे लेबल पाहून…
माझ्या बापाचं मन कळतं
आणि त्यांनं तेव्हा…
डोळ्यांच्या आड लपवलेलं पाणी
आज माझ्या डोळ्यांत दाटून येतं…
कारण,
मी माझ्या लेकरांला
रस्त्यावरून कपडे
खरेदी करताना,
त्याच्यासारखाच मी ही
तेव्हा
किलबिल्या नजरेने
ह्या दुकानांकडे पहायचो…
आणि
ह्या रंगीबेरंगी कपड्यांची
स्वप्नं तेव्हा मी नजरेमध्ये साठवायचो…
अशावेळेस,
नकळतपणे
माझा हात
माझ्या लेकरांच्या चेह-यावर
कधी फिरतो कळत नाही…
आणि
पाकिटातल्या पैशांची
संख्या काही बदलत नाही…
परिस्थितीची ही गोळा बेरीज
अजूनही तशीच आहे
आणि
मनमोकळं जगणं
अजून…
वातानुकुलीत व्हायचं आहे..
© श्री सुजित कदम
संपर्क – 117, विठ्ठलवाडी जकात नाका, सिंहगढ़ रोड,पुणे 30
मो. 7276282626
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
