सौ. मंजुषा सुधीर आफळे
कवितेचा उत्सव
☆ चांदण्यांच्या पणतीत… ☆ 
सौ. मंजुषा सुधीर आफळे ☆
☆
चांदण्यांच्या पणतीत लाविल्या ज्योती
तेजोवलयात दाटती तुमच्याच स्मृती
स्मृतिगंध तो पराक्रम आदर्श आम्हा प्रती
देशरक्षणा दिली तुम्ही प्राणांची आहुती
☆
कर्तुत्व इतके महान विस्मित होते मती
चांदण्यांच्या पणतीत लाविल्या ज्योती
ज्योतीने ज्योत उजळो बहरे मनात प्रीती
अखंड भारत स्वप्नाची होईल गें पूर्ती
☆
निखार्यावर ठेविले पद दिव्य पथ निर्मिती
शीलास धरुनी कृती फुलला बाग चांदण्यांचा
चांदण्यांच्या पणतीत लाविल्या ज्योती
अमरत्व पाहूनिया कर माझे जुळती
☆
वस्तूपाठ घालून दिला विकासा आली गती
अंतराळी फडकतो ध्वज विश्वात शोभे अती
अती प्राचीन संस्कृती मौलिक मानवा प्रति
चांदण्यांच्या पणतीत लाविला ज्योती.
☆
© सौ.मंजुषा सुधीर आफळे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
