श्री मुबारक उमराणी
कवितेचा उत्सव
☆ चयन… ☆ श्री मुबारक उमराणी ☆
काट्याच्या फांदीवरती
रक्तफुले बोलत होती
दु: ख झुल्याचे झेलत
काट्यासवे झुलत होती
फुलपाखरु रुतले
निवडुंगी झुडपात
फडफडत पंखात
अंगाई बोले रात
नागफणी खोडी काढी
पाल्याची सळसळ
येता झोका वा-याचा
काटेफांदी सोसे कळ
बगळ्याचे चुकले थवे
आसमंती फिरतात
चांदणं झेलत झेलत
फेसाटी झुडूपी शिरतात
खळखळ झरा पाण्यात
खेकडे सेना फळतांना
भयभीत मासे कल्लोळी
रातकिडे चित्कार राना
पायवाटा फसवतांना
हसतात इवले गवत
रानगाय चरतां चरता
गावताचे करते रवत
रक्तफुले सोसता सोसता
टिपकते रक्ताश्रू नयन
शल्य ह्दयी झेलत झेलत
जीवनाचे नसे हाती चयन
© श्री मुबारक उमराणी
राजर्षी शाहू काॅलनी, शामरावनगर, सांगली
मो.९७६६०८१०९७.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
