कवितेचा उत्सव
☆ गौरव मराठीचा… ☆ डॉ. मधुवंती कुलकर्णी ☆
☆
महाराष्ट्राच्या मातीमधुनी जन्मते मराठी
मातपित्याच्या लाघवामधे पाझरे मराठी
*
पसायदानी दीपामध्ये तेवते मराठी
तुकयाच्याही गाथेमध्ये गातसे मराठी
*
म्हाइंभटांचे लीळाचरित्र पेरते मराठी
चक्रधरांच्या विचारांतुनी रूजते मराठी
*
जनाबाईंच्या जात्यामध्ये ओवते मराठी
मुक्ताईची ताटी उघडे अभंगी मराठी
*
आर्या मोरोपंत सांगती जनरीत मराठी
होनाजीच्या कवनामध्ये थिरकते मराठी
*
तुतारीत केशवसुतांच्या प्राण फुंकते मराठी
कुसुमाग्रजांच्या कण्यामधुनी लढविते मराठी
*
आण्णांच्या शाहिरीमधुनी स्फुरणते मराठी
पठ्ठे बापूराव कवनात जोशते मराठी
*
महानोरांच्या जोंधळ्यातले चांदणे मराठी
इंदिरेच्या काव्यातले बहरले ॠतू मराठी
*
शिवरायांच्या पोवड्यात मर्दते मराठी
गदिमांच्या रामायणात दंगते मराठी
*
विडंबनात अत्रेंच्या खळाळते मराठी
बालकवींच्या बागेमध्ये बागडे मराठी
*
खेबुडकरी लावणीत घुंगुरते मराठी
भटांच्याही गझलेत गुंजते मराठी
*
पु.लं.चा जगप्रवास पेलते मराठी
शांताबाई कविता जपती संस्कार मराठी
*
चला जपूया आज वारसा जागवू मराठी
अभिमानाने मिरवूया जगी समृद्ध मराठी
☆
© डॉ. मधुवंती कुलकर्णी
जि.सांगली
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
