श्री तुकाराम दादा पाटील
कवितेचा उत्सव
☆ राम, राम, राम… ☆ प्रा तुकाराम दादा पाटील ☆
☆
राम आनंदी प्रभात आहे
प्रखर प्रतापी प्रपात आहे
राम सीतावर सुकांत आहे
गुणसागर हा प्रशांत आहे
*
राम धरेच्या कणात आहे
निसर्ग निर्मित धनात आहे
राम रंगला वनात आहे
विश्व व्यापल्या जगात आहे
*
राम वायुच्या सुरात आहे
युद्धा मधल्या विरात आहे
राम ठेवला घरात आहे
पवनसुताच्या उरात आहे
*
राम राहिला मठात आहे
संसाराच्या घटात आहे
राम पिकाच्या मळ्यात आहे
संतांच्या पण गळ्यात आहे
*
राम राबत्या करात आहे
गरुडाच्या ही परात आहे
राम नाटकी नटात आहे
राजकारणी पटात आहे
*
राम बांधला सुतात आहे
निवडणुकीच्या मतात आहे
राम वाटला गटात आहे
दलबदलूंच्या कटात आहे
*
राम जाहला दिगंत आहे
राम स्वरुपी अनंत आहे
राम नांदतो प्रजेत आहे
राम मंदिरी निवांत आहे
*
राम रक्षणा समर्थ आहे
पण भारत का अशांत आहे
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
