डाॅ. निशिकांत श्रोत्री
कवितेचा उत्सव
☆ धर्म बुडाला ☆ डाॅ. निशिकांत श्रोत्री ☆
☆
धर्म बुडाला द्यूतपटावर नाही कुणाचा धाक
रजस्वला मी एकवस्त्रा दीन घालते हाक ||ध्रु||
*
अंधराज कर्णहीन झाला अंधपुत्रप्रेमाने
पितामहांनी नेत्र झाकले कर्तव्यशून्यतेने
धुरंधर गुरु कर्म विसरले मानवता अगतिक
रजस्वला मी एकवस्त्रा दीन घालते हाक ||१||
*
दानवीर परी झोळीमध्ये नाही स्त्रीदाक्षिण्य
सहस्रदानांचे त्याला का मिळेल काही पुण्य
पतिव्रतेला संबोधी तो पतिता उपभोगिता
रजस्वला मी एकवस्त्रा दीन घालते हाक ||२||
*
उठी भीमा कसुनी तव बाहू दाखविण्या सामर्थ्य
चापबाण गाळून धनुर्धर दुर्मुखलेला पार्थ
याज्ञसेनी तेजस्वी अगतिक पांच पती नपुंसक
रजस्वला मी एकवस्त्रा दीन घालते हाक ||३||
*
हरुनी जाता सर्वस्व कसा दारेवर अधिकार
धर्माहस्ते अधर्म कैसा झाला घोर अघोर
चंडप्रतापी पती असोनी शील होतसे खाक
रजस्वला मी एकवस्त्रा दीन घालते हाक ||४||
*
भगिनीसाठी अशा अभागन तूच एक भ्राता
श्रीकृष्णा रे धावुन येई दुजा कोण त्राता
चीर पुरवूनी लाज राखी मम बंधुत्वाची भाक
रजस्वला मी एकवस्त्रा दीन घालते हाक ||५||
☆
© डॉ. निशिकान्त श्रोत्री
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
